خیمه ‌ده عمّه ‌لریم قوردی عزاخانه بابا

منده گلدیم یانووا شام غریبانه بابا

بیر یانان خیمه سنون عترتیوه منزلیدی

بیر بیریله هامی ماتم زده ‌لر همدلیدی

شمع محفل اولارا شعله ی آه دلیدی

جمعیدی بیر نچه پرسوخته پروانه بابا

قیزلارون قاتمیشیدی خون جگر گوز یاشینا

جاری ایلر دیله گوز یاشلارینی اوز باشینا

آنالار اوغلونا اوخشاردی باجی قارداشینا

تک‌تک اولموشدولا اندوهیله همخانه بابا

او چادردا بابا جان اوزگه بیر عالم قورولوب

اوزگه طرزیله بساط اَلم و غم قورولوب

یاسلیلار یاسه باتوب مجلس ماتم قورولوب

هره بیر یاندا گلوب ناله و افغانه بابا

هره بیر سمتیده حسرت الی قوینوندا قالوب

باجی قارداشین آنالار بالاسین یاده سالوب

اصغرین درد فراقی آنامین صبرین آلوب

بالا وای دلده توکر اشگینی دامانه بابا

هامودان عرشه چخور ناله ی یارب یارب

هر اوغولسوز آنانین دادینه لیلادی سبب

خیل ثکلالره سرخیلدی عمّم زینب

سس ویرور شوریله هر دیده ‌سی گریانه بابا

آغلادی شوریله از بس غمه باتدی بالالار

شیونیله بیبیمون صبرین آزاتدی بالالار

دل دیدی دوتدی دله آخری یاتدی بالالار

چوخ مواظبدی بیبیم جمع پریشانه بابا

گَه سنه ناله ایدردیم بابا گه قارداشیما

اورگیم قانینی قاتمشدیم آخان گوز یاشیما

شور عشقون گئجه وقتی ایله دوشدی باشیما

گیتدی سینمده توانیم داخی تالانه بابا

فکر دیداریله گوگلومده ز بس آرتدی شعف

جلوه ‌لندی گوزومه عزّت ایّام سلف

قویدوم اوز شوریله بو قورخولی میدانه طرف

سو سپم وصلیله بو آتش هجرانه بابا

دولانوردوم چولی چوخ وحشتله ناله ‌کنان

گه گیدردیم صاقا گه صول طرفه سرگردان

باشداکی شور منه مصرعیوی ویردی نشان

تا یتوردوم اوزومی محضر جانانه بابا

باشیم اوستونده آچوب طایر دولت پر و بال

ایمدی که ایلمیشم من باباجان درک وصال

دور نوازش ایله سنده منی آغوشیوه آل

سال گلن لطفیله مرهم دلِ سوزانه بابا

دوتولوب قلب ملولیم منیم ای شاه زمن

دردِ دل ایتماقا گلدیم بو گئجه یانوه من

نولی بیر خوش دلیله سنده منی دیندیره سن

غصّه ‌دن خالی اولا بو دل ویرانه بابا

یارالی پیکریوه حسرتیله من باخارام

یاندیروب شعله ی آهیله جهانی یاخارام

سن باتان قانی دوتوب زلفومه منده یاخارام

بویانا خوشدی آتایله بالا بیر قانه بابا

بدنون سهلیدی ظلمیله قزل قانه باتوب

یاره ‌لر گلدوله چوخ نیزه قلج خاری باتوب

بنزوری سنبله اوخلار بیله باش باشه چاتوب

مایه ی شوردی هر بلبل خوشخوانه بابا

نوکرون «تائبه» شاها ایله بیر عطف نظر

قویما آئینه ی قلبین دوتا چوخ رنگ کدر

او دیر سالک اوخور واردی بو سوزده چوخ اثر

ایسته قورسونلا مطافونده عزاخانه بابا

نچه ایلدور که «حسینی» ایلیوب ثبت کتاب

گل قیزیم سینمه گلمه بیله افغانه رباب

اوزی ماذون ایلدی «تائب» اونا یازدی جواب

منده گلدیم یانوا شام غریبانه بابا